المتحف الجيولوجي المصري
معلومات عن المكان
يعتبر المتحف الجيلوجي المصري الأول من نوعه في العالم العربي ومنطقة الشرق الأوسط، ويقع على كورنيش النيل بالمعادي ،ويتجاوز عمره المائة عام. أنشئ في عام 1901 ، وافتتح للجمهور في الأول من ديسمبر عام 1904م.
فيديو عن المكان
أيام العمل
يعمل طوال أيام الأسبوع ما عدا الجمعة والسبت من الساعة 9 ص إلى الساعة 2 م .
متوسط الأسعار
اسعار التذاكر:
المصري 5 جنيه
اجانب 20 جنيه
التصوير بالكاميرا 26 جنيه
التصوير بالموبايل مجاناً (متنساش تتصور مع الديناصور)
و ممكن تطلب ارشاد و شرح مع المتخصص في المتحف، بس دا بيكون بتكلفة إضافية بتبدأ من 80 جنيه و بتتغير التكلفة حسب عدد الافراد
تذكرة الدخول + رسوم الكاميرا + الشرح 135 جنيه
أهم الأنشطة داخل المكان
المتحف الجولوجي
تعرف إن المتحف الجيولوجي فيه قطعة من القمر؟
تعرف إن فيه هيكل عظمي لديناصور حقيقي؟
تعرف إن اسمك ممكن يتكتب في المتحف؟
تعرف ان فى حاجة اسمها متحف جيولوجى اساسا
المتحف الجيولوجي المصري فيه كنوز مش موجودة في أي متحف تاني في العالم
أهم و اغلى عينة في المتحف هي قطعة حقيقية من القمر قدمها دكتور فاروق الباز للمتحف و دي قيمتها ثمينة جدا دوليا و كتير من علماء الجيولوجيا بيجوا مصر مخصوص عشان يشوفوها .. و انت ممكن تدخل تشوفها ب 5 جنيه
كمان اول ما تدخل هتلاقي قصادك جمجمة "ارثينوثيرم" الضخمة، المشهور (بديناصور الفيوم) و هو نفس الشكل الخاص بشعار المتحف، كان من الكائنات الحية العملاقة اللي انقرضت في العالم كله من 40 مليون سنة ل 23 مليون سنة و بيختلف عن وحيد القرن في انه اكبر بكتير، و فيه عضمتين كبار جدا في الجمجمة على شكل قرنين
و هتلاقي على يمينك أجزاء من هيكل عظمي لديناصور حقيقي
العلماء اكتشفوه في مصر "حوالي 15% من الهيكل" و دا كنز بمعني الكلمة، لك ان تتخيل إن الديناصورات إنقرضت في العالم من اكتر من 60 مليون سنة
دا غير إن في "دولاب كامل" مليان أحجار كريمة تساوي ملايين، أهمهم الماس أو الالماظ، ياقوت، زمرد
و لاول مرة اعرف مواصفات الاحجار الكريمة زي الجمال، اللون، الحجم، النقاء، الصلابة، الوزن و القدرة على تشتيت الضوء
دايما بسأل نفسي الذهب قبل ما يبقى دهب شكله بيبقى عامل ازاي؟
لاقيت عينات للاحجار اللي بتحتوي على الذهب باشكال و احجام مختلفة و باين فيها فعلا الذهب الخام
من الحاحات المهمة جدا في المتحف قطعة بيسموها العلماء Holotype يعني القطعة الاساسية اللي بناء عليها يقدروا يحددوا مواصفات العينة، يعني مثلا في اجزاء من هيكل حوت منقرض، بالتالي لازم اي قطعة تانية في العالم تكون مواصفتها مطابقة لمواصفات ال Holotype عشان تتوصف بإنها لنفس النوع من الحيتان
من الحاجات اللي شدتتي اوي حاجة اسمها الصخور النارية زي الصخور اللي بتنتج من انفجار البراكين، و في جزء خاص بالاجزاء ((الشبه سماوية)) اللي هي تكونت بسبب الصواعق اللي وصلت للارض او النيازك و حصل تحول للعناصر اللي في الارض و اتكون منها اجزاء ليها طبيعة مختلقة عن العناصر الأساسية بسبب الطاقة و الحرارة الرهيبة
و في كمان عينات خاصة بالملك فاروق زي صدفة منقوش عليها صورته، و صدفة تانية محفور عليها مشهد من عرض اوبرا عايدة منقوشة بدقة عالية جدا
طيب .. بعد كمية الانبهارات دي خلينا نتكلم شوية عن تقسيم المتحف و تاريخه
مبدئيا كدة علم الجيولوجيا زمان كان محدود بعلوم الارض و طبقاتها، لكن بعد تطور العلم مجال علم الجيولوجيا و بقى يشمل طبقات الارض و البحار و الفضاء
و هي دي تقسيمة المتحف، جزء فيه العناصر الطبيعية زيڤ الصخور، المعادن، أحجار .. و متقسمة لعينات خاصة بالطبيعة الجيولوجية المصرية زي الرمال السوداء، و رمال سيناء، الجرانيت، الحجر الامبراطوري
و جزء تاني فيه مجموعة كبيرة جدا من العينات من كل دول العالم و كل عينة مكتوب عليها العنصر الكيميائي الخاص بيها، مصدرها و استخداماتها
و جزء تاني خاص بالكائنات الحية المنقرضة زي الديناصورات، الحيتان و انواع معينة من الثديات
تالت جزء اغلبه عينات بحرية زي القواقع، الاصداف، نجمة البحر
هتلاقي جزء فيه عينات كتير مختلفة من المعادن و الصخور مكتوب جنب كل عينة الطريقة البسيطة اللي بيتحدد على أساسها نوع العينة بسهولة و بدون تحليلها .. مثلا زي اللون، الملمس، الطعم .. كل عينة بيكون ليها مواصفات مميزة
كل نوع من العناصر الموجودة مكتوب الرمز الكميائي و منشأها و استخدامتها
ازاي اسمك ممكن يتكتب في المتحف؟
تقدر تقدم للمتحف أي عينة تعتبر إضافة حتى لو انت شايفها بسيطة زي نجمة البحر مثلا و توفر معلومات واضحة و دقيقة عنها زي المكان اللي بتتواجد فيه .. ساعتها بيتكتب اسمك جنب العينة و في سفراء لدول مختلفة قدموا للمتحف عينات نادرة، و في ناس عاديين كمان زينا كدة قدموا عينات و لحد دلوقتي اساميهم مكتوبة جنبها
اعمل حسابك انك تروح قبل الساعة ١٢ الظهر بالكتير لان الجولة تقريبا بتاخد ساعتين عشان تقدر تستمتع و تاخد وقتك في قراءة المعلومات المكتوبة جنب كل عينة (حوالي 4000 عينة)
هتستفيد جدا و تعرف معلومات مكنتش تخطر على بالك، خصوصاً الطلاب اللي مجال دراستهم متعلق بالجولوجيا .. المتحف دا بالنسبالهم عبارة عن كنز حقيقي
عنوان المكان
أول كورنيش المعادي، القاهرة
تعليقات
إرسال تعليق