داي يوز فى بورسعيد

الناس المحبين للداي يوز هتكلم النهاردة عن مكان جديد الداي يوز بما أن اسكندرية في الوقت دا زحمة ومش هتستمتع بيها اوي هنتكلم عن بورسعيد من الامكان القريبة للقاهرة الى ممكن تسافر وترجع عادي في نفس اليوم زي اسكندرية تقريبا مواصلاتها حوالى 3 ساعات 

بورسعيد 

 حقيقي البلد دى نضيفة جدا و جميلة جدا جدا و أجمل حاجة فيها هما ناسها فعلاً و طيبتهم و روحهم الحلوة اللي تخليك تحس إنك عارفهم و عايش معاهم من سنين 
وكمان انت ممكن تلفها كلها و تروح بورفؤاد و تاخد لفة حلوة هناك و كل دا في يوم واحد بس ! وارخص من فسحة في وسط البلد 
 
اللى رايح بورسعيد يطمن لانها مش بلد ممكن تتوه فيها خالص بالعكس الناس هناك متعاونة جدا و البلد صغيرة ف التنقلات سهلة أوي.
 

ازاي تروح بورسعيد من القاهرة 

قدامك طريقتين الطريقة الاولي موقف السوبرجيت الترجمان كل يوم تقريبا في اتوبيسات بتطلع بورسعيد والاجرة بقت ب  60 جنيه والطريقة التانية تسافر بالقطر وبياخد تقريبا اربع ساعات 

هتطلع من الموقف اول ما توصل و تسأل اروح المعدية ازاي ؟ هتلاقى فيه ميكروباصات من اول الشارع بتروح حتة اسمها شارع 100 و هتقوله  ينزلك عند الميكروباصات اللي بتروح المعدية و من هناك هتاخد ميكروباص خط كسرى اللي هتنزل منه قدام شارع المعدية   ( تسعيرة الميكروباص هناك  2 جنيه ) 

او ممكن تاخد تاكسى يوديك لهناك .. ولو انت من محبى المشى هنقولك توصل للمعديه ازاى مشى لو انت رايح بورسعيد بالقطر .. 

هنطلع من محطه القطر هنلاقي قدامك حديقة الفارما هتمشي من جانبها يمين هنلاقي تمثال للرئيس الراحل محمد أنور السادات وبعد كده هنلاقي شارع اسمه مصطفي كامل هتمشي فيه 5 دقايق هتلاقي قدامك مبني هيئة قناة السويس من السور الخارجي هتاخد شارع رمسيس شمال من مصطفي كامل هتلاقي نفسك في ميدان المنشية هتاخد يمين هتلاقي المعدية

جولة فى بور فؤاد 

هتركب المعدية اللي هتلحقها و هتستمتع بالمنظر جدا ، وانت راكب هتلاقى طيور النورس بتطير من حواليك .. والجميل في المعدية انها ببلاش تماما ممكن تركبها لوحدك او بعربيتك كمان و كل ما واحدة تتملى و تطلع بيبقى فيه واحدة بتطلع وراها على طول ف مش  هتقف خالص تستنى بتاخد حوالى عشر دقايق بعدها بتنزل بورفؤاد ودة  مكان من اجمل الاماكن من حيث الهدوء والجمال  من الأماكن حرفيا اللى بتحسسك انك سافرت برة مصر.

هتلاقى فى بورفؤاد مسجد كبير جدا وطرازه جميل اسمه مسجد المجمع الإسلامي هتمشي من جنبه شمال هنلاقي بيوت من دور واحد جميله جدا نفس الشكل والمساحات تحس انك بره مصر وعندك كنيسة مارجرجس وحديقه المنتزه

المكان كمان  في تأجير عجل ممكن تأجر عجلة تلف بيها بورفؤاد وفي شواطئ ممكن تخشها في واحد اسمه ستايل سكوير وهتصور البيوت اللي من جمالها  في مسلسلات اتصورت هناك قبل كدا

المنطقة حلوة جدا و هادية و فعلاً شوارعها مبتزهقش منها و من جمالها فيه كافيه هناك اسمه  سنترال بيرك في شارع الجمهوريه و دا قريب جدا من المعدية  ممكن تتمشى لحد ما توصله او تركب تاكسى 
كافيه سنترال بيرك ( Central perk )  ودة متاخد من مسلسل فريندز..  الكافيه أخذ الديزاين بتاعه بس ..  ويعتبر كخدمة و ناس شغالة هناك فعلا من أحلى الكافيهات اللي هتتبسط بيه و بديكوراته و تفاصيله أوي ( محبين مسلسل فريندز لازم يعملوله زيارة )

ممكن تعمل ايه فى بورسعيد ؟ 

هتخلص الجولة في بورفؤاد وهترجع تاني المعدية هتعدي الناحية التانية هتركب تاكسي تقوله مول (  style square )  ودا مكان تحفة في مطاعم وكافيهات وحمام سباحة دخول حمام السباحة الفرد ب 65 جنيه  وفي حمام سباحة مقفول للبنات واخره الساعة  3 العصر وفي شاطئ خاص بالمكان وعنده تأجير عجل برضه وفي لعبة paint ball ودى عبارة عن فريقين 10 اشخاص كل فريق 5 ومعاهم مسدساتهم ويضربوا بعض بالألوان والمكان في انشطة تانية

او لو عاوز تتمشى شوية في شارع اسمه الشهيد عاطف السادات دا بيطل على البحر المتوسط بس دا بيفضل يبقى التمشيه فيه بليل

 المحلات بتبقى منورة والشارع جميل جدا ونضيف من احسن الشوارع  فيه كل حاجه من قري سياحيه وفنادق وبنوك ومطاعم ومحلات ملابس وحدائق
 وفيه بردو نادي واستاد المصري البورسعيدي واللي حابب يمشي شويه علي البحر منظر القواقع والصدف فيه جميل جدا من اوله لاخره القواقع مغطيه المكان 

 الشارع الموازي لي اسمه 23 يوليو هنلاقي فيه متحف بورسعيد الحربي وبعده مديريه امن بورسعيد قصادها مسله الشهداء ومتحف النصر للفن الحديث والمسجد التوفيقي في شارع سعد زغلول 

نيجي بقا لاشهر الشوارع لشراء الملابس واماكن التسوق  هنلاقي هناك شارع التلاتيني والحميدي والتجاري كلهم ورا بعض وموازين لبعض بس متتعبش نفسك هما يعتبروا شوارع نسخة من الموسكي و العتبه ونفس الاسعار بعدها هنكمل تمشيه هنلاقي سوق البالة

الكبير دا اكبر سوق للملابس المستعملة وفيه بردو في حي الزهور ووفيه بردو بحي الزهور مقابر الكومنولث بس احب اقول لاي حد عنده فكره مسبقه ان بورسعيد الملابس فيها رخيصه وبربع التمن بس مش كل حاجة هتعجبك ننتقل بقى للجد قدام سوق الباله علي

طول سوق السمك الكبير فيه انواع لا تحصى من السمك تختار اللي تحبه 

الفنادق والاقامة في بورسعيد لو هتقضى هناك كام يوم 

لو مش حاجز فندق انزل في شارع الثلاثيني او شارع محمد علي او شارع  اوجينا كلهم فنادق حلوة وأسعار مختلفة …

لكن لو عايز حاجة اعلي شويه يبقي في آخر شارع الثلاثيني فندق light city و هينزلك فطار ....

اما لو عاوز قري سياحيه عندك من مدخل دمياط لحد نادي الصيد كلهم قري سياحيه من اولها قريه الفيروز وقرية الكناري والكروان والنورس وجنة النورس وقرية مرحبا وفندق الباتروس وعندك فندق هلنان وفندق رستا عند ديليسبس دول قري سياحيه كلهم حلويين …

وفي كمان قرية الفردوس هي خارج بورسعيد ب 5 دقايق فقط فيها مواصلات داخليه وبها اكوا بارك … لكن لو عاوز حاجه فوق الخيال جامدة يبقى قريه مرحبا هتلاقى هناك خدمة مميزة وخدمة vip ....

ولو انتم شباب و ليكم في بيوت الشباب والرياضة موجود و رخيص جدا هناك وموقعه قريب من البحر ...اضافه كمان الي المعسكر الدولى للكشافة والمرشدات تكلفة الفرد مبيت فطار وغدا وعشا حوالى 100 جنيه وممكن أقل لو مجموعه وممكن مبيت من غير غدا وعشا 50 جنيه وقريب من البحر والتجارة والسوق الكورنيش

اشهر المطاعم فى بورسعيد 

 لو عاوز تجيبي أسماك عندك 3 أسواق أما سوق السمك القديم اللي عند سوق ستوته ، أو سوق سمك رضوان بجوار قصر الثقافة في الامين ،  أو سوق السمك بشارع النصر امام سوق الباله ....بس ابقي اعمل حسابك فيه سمك طازه وسمك لا ..وننصحك  بلاش

تتسرع في شراء الكابوريا والجمبري عشان لان ممكن هتلاقي كابوريا فاضيه والجمبري صغير إلا من رحم ربي و مينفعش تكون في بورسعيد و متاكلش اكلة سمك و خصوصا لو انت في الشهور المعروفة بالسمك البوري المبطرخ. وخصوصا ان بورسعيد مشهورة بالبطارخ 

طب لو عاوز تاكل اكلات بحرية تطلع عند مجمع المطاعم خلف نادي القوات المسلحه هتلاقي هناك جميع المطاعم اشهرهم البرج و الكاستن بس الأسعار غاليه شويه 

وابقي روح بالليل عند علي بابا في سوق البازار ( سندويشات اكلات بحريه ) لكن لو عوزه حاجه في المعقول وجامده وخدمة وجوده ممتازه يبقي مطعم ابن حميدو في شارع 23 يوليو امام مسجد صالح سليم وقريب جدا للي جاي من دمياط …

عندك بردو مطعم سمكاتو في شارع الاستثمار في مدخل البلد للي جاي من الاسماعيلية بشارع عبد الرحمن شكري عند سور مصنع الغزل والنسيج ..

الاماكن الخاصة بالقعدات والسهرات في بورسعيد

عندك من الاماكن دى كتير : 

فيه عندك جيانولا في شارع الجمهوريه قعدة vip 

وعندك بيتزا بينو قريب من الممشى السياحي عند ديليسبس برضه vip

 وعندك الشيف خلف مدرسة المتحف الحربي

 وعندك طول شارع طرح البحر قريب من الشيف برضه قعدات حلوه ..

ولازم تتمشو عند الممشى السياحي و ديليسبس وتاكل ترمس والتين الشوكي ..

لعشاق الشيشة عندك كتيررررر جدا ( الصحبجية - النورس- سيتي ستار - هيرو - خلف - ميركاتو - البحرية - الجيزي ) 

وادخل بقي على عصير سلسبيلا طعمه جامد جدا فيه هناك حاجة اسمها كاستا وهوا الوحيد في مصر اللي بيعملها بالطعم ده في شارع الثلاثيني .... وجرب من عنده عصير القصب يجنن

نصائح تعملها في بورسعيد: 

-لما تنزل من الموقف بالسلامه سواء موقف مصر او موقف دمياط هتلاقي تاكسيات كتير بتحاول تغلي السعر ... أمشي شويه هتلاقي تاكسيات من على الطريق الأساسى هتلاقي السعر الرسمي ....ده لحد من اول البلد لحد آخر البلد لو معاكي شنط والعيله كلها هي 10 جنيه بس. 

-تذكرة أتوبيس النقل ب جنيه بس 

- لو عوز بحر عندك من اول نادي الصيد لحد ابراج قشلاق السواحل خصوصا بقي تحفه بعد التجديدات الاخيرة

-ومتنساش وانت راكب المعدية خد معاك عيش وارميه في المايه عشان تشوف النورس وهو بياكل منظر يجنن بصراحه 

-فيه هناك فى منطقة  البازار محل اسمه علوش بيبيع الشوكلاتات المستوردة أرخص بكتير من برا بس أهم حاجة اتاكدوا من تاريخ الصلاحية قبل ما تشتروا. 

واخيرا خليك عارف ان بورسعيد بلد صغيرة ممكن تلف اغلبها ف يوم وهتستمتع بيه جداا جداا